យុទ្ធនាការអប់រំផ្សព្វផ្សាយច្បាប់ស្តីពីសុវត្ថិភាពចរាចរណ៍ផ្លូវគោក និងពង្រឹងការពាក់មូកសុវត្ថិភាពជូនដល់ប្រជាពលរដ្ឋក្នុងខេត្តស្វាយរៀង
នៅព្រឹកថ្ងៃព្រហស្បតិ៍ ១៣រោច ខែទុតិយាសាឍ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី០៩ ខែសីហា ឆ្នាំ២០១៨ នៅតាមបណ្តោយផ្លូវជាតិលេខ១០៧ កែងផ្លូវ២០៩ ក្បែរផ្សារវាលយន្ត ក្រុងស្វាយរៀង ក្រុមការងារនាយកដ្ឋានសុវត្ថិភាពចរាចរណ៍ផ្លូវគោកនៃអគ្គនាយកដ្ឋានដឹកជញ្ជូនផ្លូវគោក ក្រសួងសាធារណការ និងដឹកជញ្ជូន អគ្គលេខាធិការដ្ឋាននៃគណៈកម្មាធិការជាតិសុវត្ថិភាពចរាចរណ៍ផ្លូវគោក សហភាពសហព័ន្ធយុវជនកម្ពុជាវិស័យសាធារណការ និងដឹកជញ្ជូន សហការជាមួយមន្ទីរសាធារណការ និងដឹកជញ្ជូន ខេត្តស្វាយរៀង និងកងកម្លាំងអធិការដ្ឋាននគរបាលចរាចរណ៍ផ្លូវគោកផ្លូវគោក បានចុះធ្វើយុទ្ធនាការអប់រំផ្សព្វផ្សាយច្បាប់ និងសុវត្ថិភាពចរាចរណ៍ផ្លូវគោក ជូនដល់ប្រជាពលរដ្ឋ ដែលកំពុងធ្វើដំណើរតាមដងផ្លូវក្នុងក្រុងស្វាយរៀង ដើម្បីជាការពញ្ញាក់ស្មារតីឱ្យមានការប្រុងប្រយ័ត្នខ្ពស់លើសុវត្ថិភាពនៅពេលធ្វើដំណើរតាមដងផ្លូវ និងបង្កើនការយល់ដឹងបន្ថែមអំពីច្បាប់ចរាចរណ៍ផ្លូវគោកផងដែរ។
យុទ្ធនាការអប់រំផ្សព្វផ្សាយនេះក៏បានការអញ្ជើញចូលរួមពី លោកជំទាវ ឯក សុវណ្ណភារៈ អភិបាលរងខេត្តស្វាយរៀង និងជាតំណាង ឯកឧត្តម ម៉ែន វិបុល អភិបាលនៃគណៈអភិបាលខេត្តស្វាយរៀង រួមទាំងលោកប្រធាននាយកដ្ឋានសុវត្ថិភាពចរាចរណ៍ផ្លូវគោក លោកប្រធានមន្ទីរសាធារណការ និងដឹកជញ្ជូនខេត្តស្វាយរៀង កងកម្លាំងអធិការដ្ឋាននគរបាលចរាចរណ៍ផ្លូវគោកខេត្តស្វាយរៀង និងមន្ត្រីពាក់ព័ន្ធជាច្រើនរូបផងដែរ។ ក្នុងយុទ្ធនាការនេះ មានការចែកជូននូវឯកសារពាក់ព័ន្ធនឹងច្បាប់ស្តីពីសុវត្ថិភាពចរាចរណ៍ផ្លូវគោក និងមានការរៀបចំជាកម្មវិធីសួរ និងឆ្លើយសំណួរអ្នកប្រើប្រាស់ទោចក្រយានយន្ត ស្តីពីច្បាប់ និងសុវត្ថិភាពចរាចរណ៍ផ្លូវគោក ដើម្បីទទួលបានមួកសុវត្ថិភាព (អ្នកឆ្លើយត្រូវ ២សំណួរ ទទួលបានមួកសុវត្ថិភាពចំនួន១)។
ជាលទ្ធផលនៅក្នុងយុទ្ធនាការនេះបានប្រើប្រាស់ដូចខាងក្រោម៖
១.មួកសុវត្ថិភាពចំនួន ១០៤មួក (កុមារ ៥០មួក មនុស្សធំ ៥៤មួក)
២.សៀវភៅច្បាប់ស្តីពីចរាចរណ៍ផ្លូវគោក ៣០០ ក្បាល
៣.ស្ទីកឃ័រចំណាំងផ្លាត ៣០០សន្លឹក
៤.សៀវភៅអ្វីដែលអ្នកបើកបរម៉ូតូត្រូវយល់ដឹង ៣០០ក្បាល
៥.ផ្ទាំងសម្រាប់ថ្មើរជើង ២០ផ្ទាំង
៦.ផ្ទាំងផ្លាកសញ្ញាចរាចរណ៍សំខាន់ៗ ២០ផ្ទាំង
៧.ខិតបណ្ណជំនួយស្មារតីស្តីពីសុត្ថិភាពចរាចរណ៍ផ្លូវគោក ៣០០ច្បាប់
៨.ខិតបណ្ណគោរពច្បាប់ចរាចរណ៍គឺដើម្បីការពារជីវិតអ្នក គ្រួសារអ្នក និងអ្នកដទៃ ៣០០សន្លឹក
៩.ផ្លិតសុវត្ថិភាពពេលឆ្លងផ្លូវសម្រាប់កុមារ ៤០០ផ្លិត៕
នៅរសៀល ថ្ងៃសុក្រ ១៣កើត ខែបុស្ស ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី១៨ ខែមករា ឆ្នាំ២០១៩ នៅទីស្តីការក្រសួងមហាផ្ទៃ មានរៀបចំកិច្ចប្រជុំបូកសរុបលទ្ធផលការងារសុវត្ថិភាពចរាចរណ៍ផ្លូវគោកប្រចាំឆ្នាំ២០១៨ និងទិសដៅការងារឆ្នាំ២០១៩ ក្រោមអធិបតីភាពដ៏ខ្ពង់ខ្ពស់ សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ និងជាប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោក។
កិច្ចប្រជុំនេះក៏មានការអញ្ជើញចូលរួមពី ថ្នាក់ដឹកនាំ នៃគណៈកម្មាធិការជាតិសុវត្ថិភាពចរាចរណ៍ផ្លូវគោក អនុគណៈកម្មការទី១ អនុគណៈកម្មការទី២ អគ្គលេខាធិការដ្ឋាន គ.ស.ច.គ រួមទាំងកងកម្លាំងនគរបាល មន្ត្រីរាជការ សិស្សនិស្សិត ស្ថាប័នពាក់ព័ន្ធព្រមទាំងដៃគូអភិវឌ្ឍន៍ផងដែរ។
តាមយៈរបាយការណ៍របស់គណៈកម្មាធិការជាតិសុវត្ថិភាពចរាចរណ៍ផ្លូវគោក ស្តីពីស្ថានភាពគ្រោះថ្នាក់ចរាចរណ៍ បានឱ្យដឹងថា គ្រោះថ្នាក់ចរណ៍ក្នុងឆ្នាំ២០១៨ បានកើតឡើងចំនួន ៣.២៦៧លើក បណ្តាលឱ្យស្លាប់ចំនួន ១.៧៦១នាក់ និងរបួសចំនួន ៤.៧៧០នាក់ ភាគច្រើននៅរាជធានីភ្នំពេញ មានអ្នកស្លាប់ ២១៧នាក់ ខេត្តកណ្តាល ១៤៨នាក់ និងខេត្តព្រះសីហនុ ១៣២នាក់។ ចំនួនជនរងគ្រោះជាមធ្យមក្នុងមួយថ្ងៃស្លាប់ ៤,៨នាក់ និងរបួសចំនួន១៣នាក់។ មូលហេតុគ្រោះថ្នាក់គឺបណ្តាលមកពី ការបើកបរលើសល្បឿនកំណត់៣៧% មិនគោរពសិទ្ធិ១៩% ការមិនប្រកាន់ស្តាំ១៣% ការវ៉ាជែង១១% ការបត់១០% ការស្រវឹង៥% កត្តាយានយន្ត៣% និងងងុយដេក ២%។ ប្រៀបធៀបឆ្នាំ២០១៧ គ្រោះថ្នាក់ចរាចរណ៍ថយចំនួន២៦៤លើក ស្មើ៧% ស្លាប់ថយចំនួន១៩នាក់ ស្មើ១% និងអ្នករបួសថតចំនួន៧៦៩នាក់ស្មើ១៤%។
ថ្ងៃសុក្រ ៦កើត ខែបុស្ស ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី១១ ខែមករា ឆ្នាំ២០១៩ អង្គការមូលនិធិ បង្ការរបួសអាស៊ី (AIP) បានរៀបចំពិធីជួបជុំ និងថ្លែងអំណរគុណដល់អ្នកឧបត្ថមគាំទ្រទៅលើសន្និសីទប្រចាំឆ្នាំ លើកទី១ ដែលធ្វើឡើងនៅសាលប្រជុំ ភោជនីយដ្ឋាន ទន្លេរបាសាក់ (ស្ពានអាកាសក្បាលថ្នល់) ដោយមានចូល រូមពី លោកជំទាវ មឹន មាណវី រដ្ឋលេខាធិការ ក្រសួងសាធារណការ និងដឹកជញ្ជូន និងជាអគ្គលេខាធិការ នៃគណៈកម្មាធិការជាតិសុវត្ថិភាពចរាចរណ៍ផ្លូវគោក (គ.ស.ច.គ) តំណាងអ្នកឧបត្ថម្ភគាំទ្រ និងក្រុមការងារប្រមាណជា ២០នាក់ ។
| អាស័យដ្ឋាន : ផ្លូវលេខ 598, សង្កាត់ ច្រាំងចំរេះ២, ខណ្ឌឬស្សីកែវ, រាជធានីភ្នំពេញ, ប្រទេសកម្ពុជា |
| ទូរស័ព្ទដៃ : (៨៥៥)២៣ ៨៦៤ ០៨២ |
| អ៊ីម៉ែល : nrsc@nrsc.gov.kh |
