នៅព្រឹក ថ្ងៃសុក្រ ៧រោច ខែចេត្រ ឆ្នាំកុរ ឯកស័ក ព.ស២៥៦២ ត្រូវនឹងថ្ងៃទី២៦ ខែមេសា ឆ្នាំ២០១៩ នៅសាលាបឋមសិក្សា អ្នកឧកញ៉ាមហាភក្តី ហ៊ុន នាង បាក់ខែង លោកជំទាវ មឹន មាណវី រដ្ឋលេខាធិការ ក្រសួងសាធារណការ និងដឹកជញ្ជូន និងជាអគ្គលេខាធិការគណៈកម្មាធិការជាតិសុវត្ថិភាពចរាចរណ៍ផ្លូវគោក បានអញ្ជើញជាអធិបតីភាពក្នុងពិធីផ្តល់អំណោយមួកសុវត្ថិភាពជូនដល់លោកគ្រូ អ្នកគ្រូ និងសិស្សានុសិស្សសរុបចំនួន ២៧៥នាក់។ 
ពិធីនេះមានការចូលរួមពីតំណាងក្រសួងអប់រំ យុវជន និងកីឡា អគ្គស្នងការនគរបាលជាតិ អង្គការសម្ព័ន្ធដើម្បីសុវត្ថិភាពចរាចរណ៍ផ្លូវគោក ក្រុមហ៊ុនEZECOM មន្ទីរសាធារណការ និងដឹកជញ្ជូនរាជធានីភ្នំពេញ សាលាខណ្ឌជ្រោយចង្វារ សាលាសង្កាត់ជ្រោយចង្វារ លោកគ្រូ អ្នកគ្រូ មាតាបិតាសិស្ស សិស្សានុសិស្ស និងប្រជាពលរដ្ឋ ប្រមាណ ៣៧៤នាក់។

ក្នុងឱកាសនោះ លោកជំទាវរដ្ឋលេខាធិការ បានមានប្រសាសន៍ថា គ្រោះថ្នាក់ចរាចរណ៍បានកើតឡើងភាគច្រើនចំពោះអ្នកប្រើប្រាស់ទោចក្រយានយន្ត ហើយមូលហេតុនៃគ្រោះថ្នាក់គឺបណ្តាលមកពី ការបើកបរហួសល្បឿនកំណត់ ការមិនគោរពសិទ្ធិអាទិភាព និងការមិនប្រកាន់ស្តាំជាដើម។ គ្រោះថ្នាក់ចរាចរណ៍បានបណ្តាលឱ្យបាត់បង់អាយុជីវិត ខូចខាតទ្រព្យសម្បត្តិរដ្ឋ និងឯកជនអស់ជាច្រើន។ លោកជំទាវ ក៏បានសំណូមក្មួយៗសិស្សានុសិស្ស ព្រមទាំងអ្នកដែលបានចូលរួមក្នុងពិធីនេះទាំងអស់ត្រូវចូលរួមគោរពច្បាប់ចរាចរណ៍ឱ្យបានខ្ជាប់ខ្ជួនជានិច្ច ត្រូវពាក់មួកសុវត្ថិភាពរាល់ពេលធ្វើដំណើរតាមទោចក្រយានយន្ត និងជាពិសេសត្រូវជួយអប់រំបន្តដល់មិត្តភ័ក្តិ បងប្អូនរបស់ខ្លួនឱ្យបានគ្រប់គ្នា។

សូមបញ្ជាក់ថា ពិធីនេះរៀបចំឡើងដោយអង្គការសម្ព័ន្ធដើម្បីសុវត្ថិភាពចរាចរណ៍ផ្លូវគោក (CRY) ក្រោមការឧបត្ថម្ភគាំទ្រថវិកាពីក្រុមហ៊ុន EZECOM ប្រចាំកម្ពុជា ក្នុងគោលបំណង រួមចំណែកកិច្ចខិតខំប្រឹងប្រែងជាមួយរាជរដ្ឋាភិបាលកម្ពុជាលើការងារជំរុញការពាក់មួកសុវត្ថិភាពទាំងអ្នកបើកបរ និងអ្នករួមដំណើរតាមទោចក្រយានយន្ត។