កិច្ចប្រជុំសម្របសម្រួលប្រចាំត្រីមាស រវាងអគ្គលេខាធិការដ្ឋាន គ.ស.ច.គ និងអង្គការសង្គមស៊ីវិល-វិស័យឯកជន 
 

នៅថ្ងៃអង្គារ ១៣កើត ខែស្រាពណ៍ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី១៣ ខែសីហា ឆ្នាំ២០១៩ នៅទីស្តីការក្រសួងសាធារណការ និងដឹកជញ្ជូន លោក ព្រំ វន្ថា ប្រធាននាយកដ្ឋានសុវត្ថិភាពចរាចរណ៍ផ្លូវគោក បានចូលរួមកិច្ចប្រជុំសម្របសម្រួលប្រចាំត្រីមាសរវាង អគ្គលេខាធិការដ្ឋានគណៈកម្មាធិការជាតិសុវត្ថិភាពចរាចរណ៍ផ្លូវគោក និងអង្គការសង្គមស៊ីវិល-វិស័យឯកជន ក្រោមអធិបតីភាព លោកជំទាវ មឹន មាណវី រដ្ឋលេខាធិការ ក្រសួងសាធារណការ និងដឹកជញ្ជូន និងជាអគ្គលេខាធិការនៃអគ្គលេខាធិការដ្ឋានគណៈកម្មាធិការជាតិសុវត្ថិភាពចរាចរណ៍ផ្លូវគោក និងមានការអញ្ជើញចូលរួមពី សមាជិក សមាជិការនៃអគ្គលេខាធិការដ្ឋាន គ.ស.ច.គ អង្គការជាតិ អង្គការក្រៅរដ្ឋាភិបាល និងក្រុមហ៊ុនឯកជនប្រមាណ ៣៨នាក់។ 
អង្គការជាតិ អង្គការក្រៅរដ្ឋាភិបាល និងក្រុមហ៊ុនឯកជន ដែលបានចូលរួមនាពេលនេះរួមមាន អង្គការ AIP Foundation, អង្គការ CRY, ឯកអគ្គរដ្ឋទូតសុឆន្ទៈវ័យក្មេងខាងសុវត្ថិភាពចរាចរណ៍, ក្រុមហ៊ុនធានារ៉ាប់រង FORTE, អង្គការកាកបាទក្រហមកម្ពុជា, ក្រុមហ៊ុន Royal Cambodian Limousine Service, ក្រុមហ៊ុន Giant Ibis, ក្រុមហ៊ុនប្រេងឥន្ធនៈ TOTAL, ក្រុមហ៊ុន GRAB, វិទ្យាស្ថានសុវត្ថិភាពចរាចរណ៍, ក្រុមហ៊ុន WMC, ក្រុមហ៊ុន RINCO, វិទ្យុFM 102, ក្រុមហ៊ុន Geolink NGO Forum និង វិទ្យាស្ថានតស៊ូមតិ និងគោលនយោបាយ។
គោលបំណងនៃការរៀបចំកិច្ចប្រជុំនាពេលនេះ គឺដើម្បីបង្កើតឱ្យមានយន្តការក្នុងការសម្របសម្រួល ឬកិច្ចសន្ទនាជាទៀតទាត់ រវាងស្ថាប័នរាជរដ្ឋាភិបាលដែលពាក់ព័ន្ធ និងអង្គការសង្គមស៊ីវិល វិស័យឯកជន ក្នុងការស្វែងយល់អំពី បច្ចុប្បន្នភាពនៃគ្រោះថ្នាក់ចរាចរណ៍នៅកម្ពុជា ការលើកឡើងអំពីសកម្មភាពការងារជាអាទិភាពរបស់គណៈកម្មាធិការជាតិសុវត្ថិភាពចរាចរណ៍ផ្លូវគោក សកម្មភាពការងារដែលអង្គការសង្គមស៊ីវិល និងវិស័យឯកជនបានចូលរួមអនុវត្តលើការងារសុវត្ថិភាពចរាចរណ៍ផ្លូវគោក។ ហើយក៏ជាឱកាសក្នុងការពិភាក្សាអំពីបញ្ហាប្រឈម និងវិធានរបស់គណៈកម្មាធិការជាតិសុវត្ថិភាពចរាចរណ៍ផ្លូវគោក ព្រមទាំងរិះរកវិធី និងធ្វើសកម្មភាពរួមគ្នា ចូលរួមធ្វើឱ្យសុវត្ថិភាពចរាចរណ៍នៅកម្ពុជាបានប្រសើរឡើង។