យុទ្ធនាការអប់រំផ្សព្វផ្សាយច្បាប់ស្តីពីចរាចរណ៍ផ្លូវគោក នៅខេត្តបន្ទាយមានជ័យ

នៅព្រឹកថ្ងៃព្រហស្បតិ៍ ៧រោច ខែស្រាពណ៍ ឆ្នាំកុរ ឯកស័ក ព.ស. ២៥៦៣ ត្រូវនឹងថ្ងៃទី២២ ខែសីហា ឆ្នាំ២០១៩ លោក ព្រំ វន្ថា ប្រធាននាយកដ្ឋានសុវត្ថិភាពចរាចរណ៍ផ្លូវគោក នៃអគ្គនាយកដ្ឋានដឹកជញ្ជូនផ្លូវគោក ក្រសួងសាធារណការ និងដឹកជញ្ជូន និងមន្ត្រីជំនាញ បានសហការជាមួយមន្ទីរសាធារណការ និងដឹកជញ្ជូនខេត្តបន្ទាយមានជ័យ កងកម្លាំងនគរបាលចរាចរណ៍ផ្លូវគោកនៃស្នងការនគរបាលខេត្តបន្ទាយមានជ័យ និងក្រុមយុវជនកាកបាទក្រហមកម្ពុជាខេត្តបន្ទាយមានជ័យ បានធ្វើការអប់រំផ្សព្វផ្សាយច្បាប់ស្តីពីចរាចរណ៍ផ្លូវគោក និងសុវត្ថិភាពចរាចរណ៍ ជូនដល់បងប្អូនប្រជាពលរដ្ឋដែលជាអ្នកប្រើប្រាស់ផ្លូវថ្នល់គ្រប់រូប ស្ថិតនៅក្នុងភូមិព្រះពន្លា សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ។ យុទ្ធនាការនេះ មានគោលបំណងអប់រំផ្សព្វផ្សាយ លើកកម្ពស់ការយល់ដឹងអំពីច្បាប់ចរាចរណ៍ផ្លូវគោក និងជាការពញ្ញាក់ស្មារតីដល់អ្នកប្រើប្រាស់ផ្លូវថ្នល់ជាពិសេសអ្នកប្រើប្រាស់ទោចក្រយានយន្តឱ្យមានការប្រុងប្រយ័ត្ននៅរាល់ពេលធ្វើដំណើរតាមដងផ្លូវ ជាពិសេសតាមបណ្តោយផ្លូវជាតិលេខ ៦។ នៅក្នុងដំណើរការនៃយុទ្ធនាការនេះ មានការចែកជូនឯកសារទាក់ទងនឹងសុវត្ថិភាពចរាចរណ៍ និងរៀបចំកម្មវិធីសួរ និងឆ្លើយសំណួរ ដើម្បីយកមួកសុវត្ថិភាពជារង្វាន់នៅពេលឆ្លើយសំណួរបានត្រឹមត្រូវ។ ជាលទ្ធផលនៃយុទ្ធនាការ គឺបានប្រើប្រាស់សម្ភារ និងឯកសារមួយចំនួនដូចខាងក្រោម៖
១.មួកសុវត្ថិភាព ចំនួន ៤៤មួក (មួកសុវត្ថិភាពសម្រាប់កុមារ ១១មួក មួកសុវត្ថិភាពសម្រាប់មនុស្សធំ ៣៣មួក) 
២.ខិតបណ្ណជំនួយស្មារតីស្តីពីសុវត្ថិភាពចរាចរណ៍ផ្លូវគោក ៤០០សន្លឹក 
៣.កាតសុវត្ថិភាព ចំនួន ១០.០០០សន្លឹក
៤.ស្ទីកឃ័រចំណាំងផ្លាត ៥០០សន្លឹក។
នៅក្នុងនោះដែរ ឯកសារ និងសម្ភារខាងលើ ដែលនៅសេសសល់ពីយុទ្ធនាការខាងលើ នាយកដ្ឋានសុវត្ថិភាពក៏បានប្រគល់ជូនមន្ទីរសាធារណការ និងដឹកជញ្ជូនខេត្តបន្ទាយជ័យទុកសម្រាប់ប្រើប្រាស់នៅក្នុងយុទ្ធនាការនាពេលមុខផង។