ថ្លែងក្នុងពិធីបើកសន្និសីទប្រចាំឆ្នាំលើកទី២ លោកជំទាវ មឹន មាណវី រដ្ឋលេខាធិការក្រសួងសាធារណការ និង ដឹកជញ្ជូន និងជាអគ្គលេខាធិការនៃអគ្គលេខាធិការដ្ឋានគណៈកម្មាធិការជាតិសុវត្ថិភាពចរាចរណ៍ផ្លូវគោក បានមានបញ្ជាក់ថាការប្រារព្ធសន្និសីទនាពេលនេះ គឺស្របទៅនឹងកាលៈទេសៈដែលកំពុងព្រួយបារម្ភរបស់រាជរដ្ឋាភិបាលនៃព្រះរាជាណាចក្រកម្ពុជា ក្នុងការខិតខំយ៉ាងសស្រាក់សស្រាំដើម្បីទប់ស្កាត់ ដែលគ្រោះថ្នាក់ភាគច្រើនកើតពីការបើកបរមិនប្រុងប្រយ័ត្ន ការមិនគោរពច្បាប់ចរាចរណ៍ ហើយបានបង្កឱ្យស្លាប់ ពិការ និងខាតបង់ទ្រព្យសម្បត្តិទាំងរដ្ឋ និងរបស់ឯកជន បង្កឱ្យមានទុក្ខសោកដោយសារការបាត់អាយុជីវិតមនុស្សជាទីស្រឡាញ់ ឬបង្គោលគ្រួសារ។

លោកជំទាវបានសម្តែងនូវភាពជឿជាក់ថាសន្និសីទនេះនឹងសម្រេចគោលដៅក្នុងការកៀងគរទាំងធនធានមនុស្ស បច្ចេកវិទ្យា ថវិកា សម្ភារ ឆន្ទៈ និងអនុសាសន៍ថ្មីៗ ដើម្បីរួមចំណែកជាមួយរាជរដ្ឋាភិបាលដែលបាននឹងកំពុងអនុវត្តគោលនយោបាយជាតិសុវត្ថិភាពចរាចរណ៍ និងផែនការជាតិទសវត្សចរាចរណ៍ឆ្នាំ២០១១-២០២០ ក៏ដូចជាគោលដៅទសវត្សរ៍ចរាចរណ៍របស់អង្គការសហប្រជាជាតិឆ្នាំ២០១១-២០២០ក្នុងការកាត់បន្ថយចំនួនអ្នកស្លាប់ឱ្យបាន ៥០% លើចំនួនប៉ាន់ថាបើមិនមានវិធានការទប់ស្កាត់គ្រោះថ្នាក់ចរាចរណ៍សោះ កម្ពុជានឹងមានអ្នកស្លាប់នៅតាមដងផ្លូវប្រមាណ៣.២០០នាក់ ដែលយើងចាំបាច់ត្រូវកាត់បន្ថយអ្នកស្លាប់ឱ្យនៅត្រឹម១.៦០០នាក់។

លោកជំទាវបានស្នើអង្គសន្និសីទគួរចាប់អារម្មណ៍ផ្លាស់ប្តូរយោបល់ដើម្បីជាធាតុចូលសម្រាប់ការលើកជាវិធានការដែលមានប្រសិទ្ធភាពក្នុងការការពារអាយុជីវិត កាយសម្បទាមនុស្សជាទីស្រឡាញ់ និងទ្រព្យសម្បត្តិ កុំឱ្យមច្ចុរាជឆក់ពីយើងទៅទាំងក្នុងពេលបច្ចុប្បន្ន និងក្នុងទសវត្សរ៍បន្ទាប់។