កិច្ចប្រជុំណែនាំស្តីពី ការត្រួតពិនិត្យការអនុវត្តផែនការសកម្មភាពសុវត្ថិភាពចរាចរណ៍ផ្លូវគោកឆ្នាំ២០១៩ នៅសាលាខេត្តសៀមរាប
 

នៅព្រឹក ថ្ងៃពុធ ៣កើត ខែកត្តិក ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី៣០ ខែតុលា ឆ្នាំ២០១៩ នៅសាលប្រជុំសាលាខេត្តសៀមរាប ក្រុមការងារជំរុញអនុវត្តផែនការសកម្មភាពសុវត្ថិភាពចរាចរណ៍ផ្លូវគោក នៃគណ:កម្មាធិការជាតិសុវត្ថិភាពចរាចរណ៍ផ្លូវគោក បានរៀបចំការប្រជុំណែនាំស្តីពីការត្រួតពិនិត្យការអនុវត្តផែនការសកម្មភាពសុវត្ថិភាពចរាចរណ៍ផ្លូវគោកឆ្នាំ២០១៩ ដឹកនាំដោយ ឯកឧត្តម នាយឧត្តមសេនីយ៍ ហ៊ឹម យ៉ាន អគ្គស្នងការរងនគរបាលជាតិ និងអមដំណើរដោយ លោក ព្រំ វន្ថា ប្រធាននាយកដ្ឋានសុវត្ថិភាពចរាចរណ៍ផ្លូវគោក និងលោកឧត្តមសេនីយ៍ទោ ឡុង ធូ អនុប្រធាននាយកដ្ឋាននគរបាលចរាចរណ៍ និងសណ្តាប់ធ្នាប់សាធារណ: នៃអគ្គស្នងការនគរបាលជាតិ។ សមាសភាព ដែលបានអញ្ជើញចូលរួម រួមមាន នាយកដ្ឋានសុវត្ថិភាពចរាចរណ៍ផ្លូវគោក មន្ទីរសាធារណការ និងដឹកជញ្ជូនខេត្ត និងតំណាងឯឧត្តម អភិបាលរងនៃគណ:ភិបាលខេត្តសៀមរាប ស្នងការនគរបាលខេត្ត មន្ទីរអប់រំ យុវជន និងកីឡាខេត្ត មន្ទីរការងារ និងបណ្តុះបណ្តាលវិជ្ជាជីវ:ខេត្ត មន្ទីរព័ត៌មានខេត្ត កងរាជអាវុធហត្ថខេត្ត ដែលសមាជិកចូលរួមសរុបមានចំនួន ២១នាក់។ កិច្ចប្រជុំនេះ មានគោលបំណងដើម្បីពង្រឹងយន្តការដឹកនាំ និងគ្រប់គ្រងការងារសុវត្ថិភាពនៅគ្រប់លំដាប់ថ្នាក់ ក្នុងការអនុវត្តការងារឱ្យមានប្រសិទ្ធិភាពលើវិធានការសំខាន់ៗទាំងបួន រួមមាន ការរឹតបន្តឹងការអនុវត្តច្បាប់ ការផ្សព្វផ្សាយអប់រំច្បាប់ និងបទដ្ឋានសុវត្ថិភាពចរាចរណ៍ផ្លូវគោក ការរៀបចំសណ្តាប់ធ្នាប់ផ្លូវសាធារណ:ឱ្យមានសុវត្ថិភាពដល់ការធ្វើចរាចរណ៍ និងការសិក្សាកែលម្អរខ្លឹមសារច្បាប់ស្តីពីចរាចរណ៍ផ្លូវគោក ហើយនិងបានណែនាំស្តីពីការអនុវត្តចលនាប្រឡងប្រណាំង “តំបន់ពិសេសនៃសុវត្ថិភាពចរាចរណ៍ផ្លូវគោក” ដើម្បីធ្វើការវាយតម្លៃតំបន់ដែលធ្វើសកម្មភាពរៀបចំជាសង្វាក់ប្រព័ន្ធដំណើរការឱ្យមានសុវត្ថិភាពចរាចរណ៍ផ្លូវគោកក្នុងតំបន់កំណត់ណាមួយ ឈានទៅសម្រេចផ្តល់ជ័យលាភីដល់តំបន់ដែលទទួលបានជោគជ័យនៅទូទាំង ២៥ រាជធានី ខេត្ត។