យុទ្ធនាការអប់រំផ្សព្វផ្សាយស្តីពីចរាចរណ៍ផ្លូវគោក ដល់សិស្សានុសិស្ស មុនឱកាសពិធីបុណ្យអុំទូក បណ្តែតប្រទីប អកអំបុក និងសំពះព្រះខែ នៅខេត្តកំពត

នៅព្រឹកថ្ងៃសុក្រ ១២កើត ខែកត្តិក ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី ៨ ខែ វិច្ឆិកា ឆ្នាំ២០១៩ នៅវិទ្យាល័យជាស៊ីមអង្គជ័យ ស្ថិតនៅក្នុងភូមិប្រាល ឃុំតានី ស្រុកអង្គជ័យ ខេត្តកំពត ក្រុមការងារនាយកដ្ឋានសុវត្ថិភាពចរាចរចណ៍ផ្លូវគោក នៃអគ្គនាយកដ្ឋានដឹកជញ្ជូនផ្លូវគោក នៃក្រសួងសាធារណការ និងដឹកជញ្ជូន ដឹកនាំដោយ លោក សេន ជាតិវិសុទ្ធ អនុប្រធាននាយកដ្ឋានសុវត្ថិភាពចរាចរណ៍ផ្លូវគោក បានសហការជាមួយអគ្គលេខាធិការដ្ឋាន គ.ស.ច.គ. និងមន្ទីរសាធារណរការ និងដឹកជញ្ជូនខេត្តកំពត បានចុះធ្វើយុទ្ធនការអប់រំផ្សព្វផ្សាយស្តីពីសុវត្ថិភាពចរាចរណ៍មុនឱកាសពិធីបុណ្យអុំទូក បណ្តែតប្រទីប អកអំបុក និងសំពះព្រះខែ ដល់សិស្សានុសិស្សនៃវិទ្យាល័យជាស៊ីមអង្គជ័យ សរុបចំនួន ៦៤១នាក់ ស្រីចំនួន ៣៣៨នាក់។ យុទ្ធនាការនេះ មានការចូលរួមជាអធិបតីភាពពី អភិបាលរងស្រុកអង្គជ័យ ដោយបានចែកឯកសារពាក់ព័ន្ធនឹងច្បាប់ស្តីពីចរាចរណ៍ផ្លូវគោក និងរៀបចំកម្មវិធីសួរ និងឆ្លើយសំណួរស្តីពីច្បាប់ និងសុវត្ថិភាពចរាចរណ៍ផ្លូវគោក ដើម្បីទទួលបានមួកសុវត្ថិភាពជារង្វាន់។
ជាលទ្ធផលនៅក្នុងយុទ្ធនាការនេះ បានចែកជូនសម្ភារ និងឯកសារស្តីពីសុវត្ថិភាពចរាចរណ៍ផ្លូវគោកមួយចំនួនដូចជា៖
១.មួកសុវត្ថិភាព ១០០មួក
២.សៀវភៅច្បាប់ស្តីពីចរាចរណ៍ផ្លូវគោក ១០ក្បាល
៣.ស្ទីឃ័រចំណាំផ្លាត ៥០០សន្លឹក
៤.ខិត្តបណ្ណជំនួយស្មារតី ៩០០ សន្លឹក
៥.ផ្ទាំងរូបភាពសញ្ញាចរាចរណ៍ ១០ផ្ទាំង។