យុទ្ធនាការអប់រំផ្សព្វផ្សាយ “រួមគ្នាដើម្បីសុវត្ថិភាពចរាចរណ៍” និងការចែកជូនមួកដោយឥតគិតថ្លៃ នៅក្រុងស្ទឹងសែន ខេត្តកំពង់ធំ
 

នៅថ្ងៃព្រហស្បតិ៍ ៨រោច ខែមិគសិរ ឆ្នាំកុរ ឯកស័ក ពុទ្ធសករាជ ២៥៦៣ ត្រូវនឹងថ្ងៃទី១៩ ខែធ្នូ ឆ្នាំ២០១៩ នៅចំណុចសួនច្បារដំរីជាន់ខ្លា ស្ថិតក្នុងក្រុងស្ទឹងសែន ខេត្តកំពង់ធំ នាយកដ្ឋានសុវត្ថិភាពចរាចរណ៍ផ្លូវគោក នៃអគ្គនាយកដ្ឋានដឹកជញ្ជូនផ្លូវគោក របស់ក្រសួងសាធារណការ និងដឹកជញ្ជូន បានសហការជាមួយអគ្គលេខាធិការដ្ឋាន គ.ស.ច.គ ក្រុមហ៊ុន Michelin ក្រុមហ៊ុនវើលដ៍ប្រ៊ីដត្រេតឌីង និង មន្ទីរសាធារណការ និងដឹកជញ្ជូនខេត្តកំពង់ធំ និងមានការចូលរួមពីកងកម្លាំងនគរបាលចរាចរណ៍ផ្លូវគោកខេត្តកំពង់ធំ យុវជនរបស់សហភាពសហព័ន្ធយុវជនកម្ពុជាក្នុងវិស័យសាធារណការ និងដឹកជញ្ជូន បានធ្វើយុទ្ធនាកាអប់រំផ្សព្វផ្សាយ “រួមគ្នាដើម្បីសុវត្ថិភាពចរាចរណ៍”។
យុទ្ធនាការនេះ ដឹកនាំដោយ លោក ព្រំ វន្ថា ប្រធាននាយកដ្ឋានសុវត្ថិភាពចរាចរណ៍ផ្លូវគោក លោក ជូ កុល្លា ប្រធានមន្ទីរសាធារណការ និងដឹកជញ្ជូនខេត្តកំពង់ធំ លោក អេង រស់ អនុប្រធានមន្ទីរសាធារណការ និងដឹកជញ្ជូនខេត្តកំពង់ធំ និងមានការអញ្ជើញចូលរួមជាកិត្តិយសដោយ ឯកឧត្តម សុខ លូ អភិបាលនៃគណៈអភិបាលខេត្តកំពង់ធំ និងមានការសម្របសម្រួលពីមន្ត្រីពាក់ព័ន្ធនៃក្រសួងសាធារណការ និងដឹកជញ្ជូន និងក្រុមការងាររបស់ក្រុមហ៊ុន Micheline។
យុទ្ធនាការនេះ មានការផ្តល់ជូននូវសេវាត្រួតពិនិត្យសុវត្ថិភាពយានយន្តចំនួន ៣០ចំណុច និងមានកម្មវិធីសួរ និងឆ្លើយសំណួរយកមួកសុវត្ថិភាពចំនួន ២០០មួក។
គោលបំណងនៃការរៀបចំយុទ្ធនាការនេះ គឺដើម្បីបង្កើនការយល់ដឹងអំពីច្បាប់ចរាចរណ៍ផ្លូវគោក និងវិធានសុវត្ថិភាពចរាចរណ៍ ការបង្កើនសុវត្ថិភាពយានយន្ត កាត់បន្ថយអត្រាស្លាប់ដោយសារការប៉ះទង្គិចក្បាលបណ្តាលមកពីគ្រោះថ្នាក់ចរាចរណ៍នៅកម្ពុជាឱ្យនៅកម្រិតទាប។
សូមបញ្ជាក់ថា យុទ្ធនាការបន្ទាប់នឹងរៀបចំធ្វើឡើងនៅថ្ងៃទី២១ ខែធ្នូ ឆ្នាំ២០១៩ ក្នុងក្រុងសៀមរាប ខេត្តសៀមរាប។