យុទ្ធនាការអប់រំផ្សព្វផ្សាយ “រួមគ្នាដើម្បីសុវត្ថិភាពចរាចរណ៍” និងការចែកជូនមួកដោយឥតគិតថ្លៃ នៅក្រុងសៀមរាប ខេត្តសៀមរាប
 

នៅថ្ងៃសៅរ៍ ១០រោច ខែមិគសិរ ឆ្នាំកុរ ឯកស័ក ពុទ្ធសករាជ ២៥៦៣ ត្រូវនឹងថ្ងៃទី២១ ខែធ្នូ ឆ្នាំ២០១៩ នាយកដ្ឋានសុវត្ថិភាពចរាចរណ៍ផ្លូវគោក នៃអគ្គនាយកដ្ឋានដឹកជញ្ជូនផ្លូវគោក របស់ក្រសួងសាធារណការ និងដឹកជញ្ជូន បានសហការជាមួយអគ្គលេខាធិការដ្ឋាន គ.ស.ច.គ ក្រុមហ៊ុន Michelin ក្រុមហ៊ុនវើលដ៍ប្រ៊ីដត្រេតឌីង និង មន្ទីរសាធារណការ និងដឹកជញ្ជូនខេត្តសៀមរាប និងមានការចូលរួមពីកងកម្លាំងនគរបាលចរាចរណ៍ផ្លូវគោកខេត្តសៀមរាប និងយុវជនរបស់សហភាពសហព័ន្ធយុវជនកម្ពុជាក្នុងវិស័យសាធារណការ និងដឹកជញ្ជូន បានចុះធ្វើយុទ្ធនាកាអប់រំផ្សព្វផ្សាយ “រួមគ្នាដើម្បីសុវត្ថិភាពចរាចរណ៍” នៅចំណុចមុខសណ្ឋាគារអង្គរអេរ៉ា ស្ថិតក្នុងភូមិខ្នារ សង្កាត់ជ្រាវ ក្រុងសៀមរាប ខេត្តសៀមរាប។
លោក ព្រំ វន្ថា ប្រធាននាយកដ្ឋានសុវត្ថិភាពចរាចរណ៍ផ្លូវគោក និងលោក ជូត ច័ន្ទតារា អនុប្រធានមន្ទីរសាធារណការ និងដឹកជញ្ជូនខេត្តសៀមរាប បានចូលរួមដឹកនាំយុទ្ធនាការនេះ ហើយនិងមានការអញ្ជើញចូលរួមពី លោក វរៈសេនីយ៍ឯក ជឹម សុវណ្ណ នាយការិយាល័យសុវត្ថិភាពចរាចរណ៍ផ្លូវគោក និងសណ្តាប់ធ្នាប់ខេត្តសៀមរាប និងមានការសម្របសម្រួលពីមន្ត្រីពាក់ព័ន្ធនៃក្រសួងសាធារណការ និងដឹកជញ្ជូន និងក្រុមការងាររបស់ក្រុមហ៊ុន Micheline។
យុទ្ធនាការនេះមានរៀបចំជាកម្មវិធីសួរ និងឆ្លើយសំណួរយកមួកសុវត្ថិភាព ការចែកជូនឯកសារពាក់ព័ន្ធនឹងច្បាប់ចរាចរណ៍ផ្លូវគោក និងស្ទីកឃ័រចំណាំងផ្លាត រួមទាំងការផ្តល់ជូនសេវាត្រួតពិនិត្យសុវត្ថិភាពយានយន្តចំនួន៣០ចំណុចដល់អ្នកចូលរួមទាំងអស់។
លោក ព្រំ វន្ថា ប្រធាននាយកដ្ឋានសុវត្ថិភាពចរាចរណ៍ផ្លូវគោក បានមានប្រសាសន៍ថា៖ បងប្អូនប្រជាពលរដ្ឋដែលចូលរួមក្នុងយុទ្ធនាការអប់រំផ្សព្វផ្សាយ និងជាពិសេសអ្នកប្រើប្រាស់ទោចក្រយានយន្ត អាចចូលរួមឆ្លើយសំណួរយករង្វាន់មួកសុវត្ថិភាពពីក្រុមការងារបាន តាមរយៈកម្មវិធី “Cambodia Driving Rules” ដែលជាកម្មវិធីប្រើប្រាស់លើឧបករណ៍អេឡិចត្រូនិចបង្កើតឡើងដោយក្រសួងសាធារណការ និងដឹកជញ្ជូន ហើយបងប្អូនក៏អាចទាញយកកម្មវិធីនេះមកប្រើប្រាស់ក្នុងទូរស័ព្ទដៃរបស់ខ្លួនដោយឥតគិតថ្លៃ និងអាចទាញយកមកសិក្សារៀនសូត្រអំពីច្បាប់ចរាចរណ៍ផ្លូវគោក និងប្រលងសាកល្បងដោយខ្លួនឯងបានផងដែរ។
លោក វរៈសេនីយ៍ឯក ជឹម សុវណ្ណ បានសម្តែងនូវភាពរីករាយដោយបានឃើញពីចូលរួមយ៉ាងច្រើនកុះកររបស់បងប្អូនប្រជាពលរដ្ឋខេត្តសៀមរាបនៅក្នុងយុទ្ធនាការអប់រំផ្សព្វផ្សាយស្តីពីច្បាប់ចរាចរណ៍ផ្លូវគោកនាពេលនេះ ជាពិសេសអ្នកប្រើប្រាស់ទោចក្រយានយន្តផ្ទាល់តែម្តង។ យុទ្ធនាការនេះគឺពិតជាបានជួយរួមចំណែកអប់រំផ្សព្វផ្សាយបណ្តុះស្មារតីរបស់បងប្អូនប្រជាពលរដ្ឋឱ្យចូលរួមស្វែងយល់អំពីច្បាប់ចរាចរណ៍ផ្លូវគោក គោរពច្បាប់ចរាចរណ៍ និងជាពិសេសជំរុញឱ្យមានការពាក់មួកសុវត្ថិភាពគ្រប់ពេលវេលានាពេលប្រើប្រាស់ទោចក្រយានយន្ត មិនថានៅទីជិត ឬឆ្ងាយ។