កិច្ចប្រជុំបូកសរុបលទ្ធផលការងារសុវត្ថិភាពចរាចរណ៍ផ្លូវគោកប្រចាំខែមករា ឆ្នាំ២០២០ របស់គណៈកម្មាធិការជាតិសុវត្ថិភាពចរាចរណ៍ផ្លូវគោក
 

នៅព្រឹក ថ្ងៃព្រហស្បតិ៍ ៥កើត ខែផល្គុន ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី២៧ ខែកុម្ភៈ ឆ្នាំ២០២០ នៅទីស្តីការក្រសួងមហាផ្ទៃ មានរៀបចំកិច្ចប្រជុំបូកសរុបលទ្ធផលការងារសុវត្ថិភាពចរាចរណ៍ផ្លូវគោកប្រចាំខែមករា ឆ្នាំ២០២០ របស់គណៈកម្មាធិការជាតិសុវត្ថិភាពចរាចរណ៍ផ្លូវគោក ក្រោមអធិបតីភាពដ៏ខ្ពង់ខ្ពស់ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោក។ កិច្ចប្រជុំនេះក៏មានការអញ្ជើញចូលរួមពី ឯកឧត្តម លោកជំទាវ ឯកឧត្តមនាយឧត្តមសេនីយ៍ កងកម្លាំងនគរបាល និង មន្ត្រីរាជការ ដែលជាសមាជិក សមាជិកា នៃគណៈកម្មាធិការជាតិសុវត្ថិភាពចរាចរណ៍ផ្លូវគោកផងដែរ។

តាមរយៈរបាយការណ៍របស់គណៈកម្មាធិការជាតិសុវត្ថិភាពចរាចរណ៍ផ្លូវគោកស្តីពីសភាពការណ៍គ្រោះថ្នាក់ចរាចរណ៍ បានឱ្យដឹងថា គ្រោះថ្នាក់ចរាចរណ៍ក្នុងខែមករា ឆ្នាំ២០២០ បានកើតឡើងចំនួន ៣៥៨លើក បណ្តាលឱ្យស្លាប់ចំនួន ២០៦នាក់ និងរបួសចំនួន ៥៥៨នាក់។
មូលហេតុគ្រោះថ្នាក់ គឺបណ្តាលមកពី ការបើកបរលើសល្បឿនកំណត់ ៤១% មិនគោរពសិទ្ធិ ២២% មិនប្រកាន់ស្តាំ ១០% វ៉ាជែង ១១% បត់ ៧% ស្រវឹង ៦% កត្តាយានយន្ត ៣%។ ប្រៀបធៀបខែធ្នូ ឆ្នាំ២០១៩ គ្រោះថ្នាក់ថយចុះចំនួន ១២លើក ស្មើ ៣% ស្លាប់កើន ២០នាក់ ស្មើ ១១% និងរបួសកើន ៥៨នាក់ ស្មើ១២%។

ប្រៀបធៀបខែមករា ឆ្នាំ២០១៩ គ្រោះថ្នាក់កើនឡើងចំនួន ២៧លើកស្មើ ៨% ស្លាប់កើនចំនួន ៥៨នាក់ ស្មើ ៣៩% និងរបួសកើន ៤១នាក់ ស្មើ ៨%។ ភូមិសាស្ត្រមានអ្នកស្លាប់ច្រើន គឺ រាជធានីភ្នំពេញ (៣៤នាក់) ខេត្តព្រះសីហនុ (១៩នាក់) ខេត្តកំពង់ស្ពឺ (១៥នាក់) និងភូមិសាស្ត្រដែលមានកំណើនអ្នកស្លាប់ និងរបួស មាន ១០រាជធានី ខេត្តគឺ រាជធានីភ្នំពេញ ខេត្តព្រះវិហារ ខេត្តពោធិ៍សាត់ ខេត្តសៀមរាប ខេត្តកំពង់ចាម ខេត្តកំពង់ឆ្នាំង ខេត្តកំពត ខេត្តកំពង់ធំ ខេត្តក្រចេះ និង ខេត្តឧត្តរមានជ័យ។

សម្តេចបានកោតសរសើរចំពោះមន្ត្រីអនុវត្តច្បាប់ស្តីពីចរាចរណ៍ផ្លូវគោកគ្រប់លំដាប់ថ្នាក់ដែលបានខិតខំយ៉ាងសកម្មក្នុងការរឹតបន្តឹងការអនុវត្តច្បាប់ ការធ្វើវិសោធនកម្មអនុក្រឹត្យស្តីពីការពិន័យអន្តរការណ៍ចំពោះអំពើល្មើសនឹងច្បាប់ស្តីពីចរាចរណ៍ផ្លូវគោក ការអប់រំផ្សព្វផ្សាយច្បាប់ ការកសាងនិងការកែលម្អផ្លូវថ្នល់ ការសង្គ្រោះជនរងគ្រោះដោយគ្រោះថ្នាក់ចរាចរណ៍ផ្លូវគោក។ ដើម្បីជំរុញទប់ស្កាត់ និងកាត់បន្ថយឱ្យបានជាអតិបរមានូវកំណើនគ្រោះថ្នាក់ចរាចរណ៍ផ្លូវគោក កំណើនអ្នកស្លាប់ និងរបួសដោយគ្រោះថ្នាក់ចរាចរណ៍ផ្លូវគោកសំដៅរួមចំណែកអនុវត្តគោលនយោបាយរបស់រាជរដ្ឋាភិបាលក្នុងការកាត់បន្ថយភាពក្រីក្ររបស់ប្រជាពលរដ្ឋ សម្តេចក៏បានប្រកាសកំណត់យកឆ្នាំ២០២០នេះ ជាឆ្នាំនៃការរឹតបន្តឹងអនុវត្តច្បាប់ស្តីពីចរាចរណ៍ផ្លូវគោក ដោយបានដាក់ចេញនូវវិធានការសំខាន់ៗបន្ទាប់ចំនួន ៧ចំណុច មានដូចជា៖
១.លើកកម្ពស់ប្រសិទ្ធិភាពដឹកនាំរឹតបន្តឹងការអនុវត្តច្បាប់ស្តីពីចរាចរណ៍ផ្លូវគោកឱ្យបានខ្លាំងក្លានៅទូទាំងប្រទេស
២. ពង្រឹងវិធានការរឹតបន្តឹងច្បាប់ឱ្យបានម៉ឺងម៉ាត់ ដាច់ខាត ត្រឹមត្រូវ ស្មើភាព មិនរើសអើង និងជាប់ជាប្រចាំ ចំពោះអំពើល្មើស
៣. ដឹកនាំបង្កើនសកម្មភាពអប់រំផ្សព្វផ្សាយ ឱ្យបានទូលំទូលាយ ស៊ីជម្រៅដល់គ្រប់គោលដៅ ឱ្យបានជ្រួតជ្រាបអំពីច្បាប់ស្តីពីចរាចរណ៍ផ្លូវគោក
៤. ពង្រឹងការគ្រប់គ្រងហេដ្ឋារចនាសម្ព័ន្ធផ្លូវថ្នល់ រួមមានការកសាង ជួសជុលផ្លូវ ស្ពាន កែសម្រួលប្រព័ន្ធផ្លូវថ្នល់និងទិសចរាចរណ៍ ការគ្រប់គ្រងទ្រូងផ្លូវ ចិញ្ចើមផ្លូវ ការបង្កើតចំណតសាធារណៈ ការបំពាក់បរិក្ខារផ្លូវថ្នល់ឱ្យបានគ្រប់គ្រាន់
៥. បង្កើនការគ្រប់គ្រងទ្រូងផ្លូវ ចំណីផ្លូវ និងការរៀបចំសណ្តាប់ធ្នាប់ចរាចរណ៍ នៅតាមតំបន់ទីប្រជុំជន សាលារៀន រោងចក្រ និងចំណត
៦. ជំរុញការធ្វើវិសោធនកម្មអនុក្រឹត្យស្តីពីការពិន័យអន្តរការណ៍ចំពោះអំពើល្មើសនឹងច្បាប់ស្តីចរាចរណ៍ផ្លូវគោក
៧. ចាត់តាំងចុះត្រួតពិនិត្យការអនុវត្តផែនការ និងទិសដៅការងាររបស់ គ.ស.ច.គ នៅរាជធានី ខេត្តដែលមានគ្រោះថ្នាក់ចរាចរណ៍។

សម្តេចបានអំពាវនាវដល់អ្នកប្រើប្រាស់ផ្លូវគ្រប់រូប សូមចូលរួមរក្សាសុវត្ថិភាពចរាចរណ៍ផ្លូវគោក តាមរយៈការគោរពប្រតិបត្តិខ្ជាប់ខ្ជួននូវច្បាប់ស្តីពីចរាចរណ៍ផ្លូវគោក និងសេចក្តីប្រកាសរបស់គណៈកម្មាធិការជាតិសុវត្ថិភាពចរាចរណ៍ផ្លូវគោក ស្តីពីការរឹតបន្តឹងការអនុវត្តច្បាប់ស្តីពីចរាចរណ៍ផ្លូវគោក ព្រមទាំងត្រូវបើកបរប្រកបដោយសីលធម៌យោគយល់អាធ្យាស្រ័យនៅគ្រប់កាលៈទេសៈ។