យុទ្ធនាការអប់រំផ្សព្វផ្សាយស្តីពីសុវត្ថិភាពចរាចរណ៍ផ្លូវគោក ខេត្តស្ទឹងត្រែង ក្រោមអធិបតីភាព លោកជំទាវ មឹន មាណវី រដ្ឋលេខាធិការ ក្រសួងសាធារណការ និងដឹកជញ្ជូន និងជាអគ្គលេខាធិការ នៃអគ្គលេខាធិការដ្ឋាន គ.ស.ច.គ.

នៅថ្ងៃព្រហស្បតិ៍ ៥កើត ខែអាសាឍ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី២៥ ខែមិថុនា ឆ្នាំ២០២០ អគ្គលេខាធិការដ្ឋាន នៃគណៈកម្មាធិការជាតិសុវត្ថិភាពចរាចរណ៍ផ្លូវគោក សហការជាមួយនាយកដ្ឋានសុវត្ថិភាពចរាចរណ៍ផ្លូវគោក នៃអគ្គនាយកដ្ឋានដឹកជញ្ជូនផ្លូវគោក ក្រសួងសាធារណការ និងដឹកជញ្ជូន មន្ទីរសាធារណការ និងដឹកជញ្ជូនខេត្តស្ទឹងត្រែង លេខាធិការដ្ឋានអនុគណៈកម្មការសុវត្ថិភាពចរាចរណ៍ផ្លូវគោកខេត្តស្ទឹងត្រែង ស.ស.យ.ក ក្នុងវិស័យសាធារណការ និងដឹកជញ្ជូន បានធ្វើយុទ្ធនាការអប់រំផ្សព្វផ្សាយច្បាប់ស្តីពីចរាចរណ៍ផ្លូវគោក ដល់បងប្អូនប្រជាពលរដ្ឋជាអ្នកប្រើប្រាស់ផ្លូវទាំងអស់ ដែលស្ថិតនៅក្នុងភូមិត្រពាំងព្រីង សង្កាត់ស្ទឹងត្រែង ក្រុងស្ទឹងត្រែង ខេត្តស្ទឹងត្រែង។
យុទ្ធនាការនេះ ទទួលបានការចូលរួមជាអធិបភាពពី លោកជំទាវ មឹន មាណវី រដ្ឋលេខាធិការ ក្រសួងសាធារណការ និងដឹកជញ្ជូន និងជាអគ្គលេខាធិការ នៃអគ្គលេខាធិការដ្ឋាន គ.ស.ច.គ. ឯកឧត្តម ដួង ពៅ អភិបាលរងខេត្តស្ទឹងត្រែង តំណាងឯកឧត្តម ម៉ុម សារឿន អភិបាលនៃគណៈអភិបាលខេត្តស្ទឹងត្រែង និងជាប្រធានអនុគណៈកម្មការសុវត្ថិភាពចរាចរណ៍ផ្លូវគោកខេត្តស្ទឹងត្រែង និងមានការចូលរួមអមដំណើរដោយ លោក ព្រំ វន្ថា ប្រធាននាយកដ្ឋានសុវត្ថិភាពចរាចរណ៍ផ្លូវគោក និងជាប្រធានផ្នែកអប់រំផ្សព្វផ្សាយ នៃអគ្គលេខាធិការដ្ឋាន គ.ស.ច.គ. លោក ប្រាក់ សុភ័ណ្ឌ អនុប្រធានមន្ទីរសាធារណការ និងដឹកជញ្ជូនខេត្តស្ទឹងត្រែង។ យុទ្ធនាការនេះ មានការចូលរួមពីកងកម្លាំងនគរបាល កងរាជអាវុធហត្ថ មន្ត្រីរាជការ និងបងប្អូនប្រជាពលរដ្ឋក្នុងក្រុងស្ទឹងត្រែង ប្រមាណជាង ១០០នាក់។
តាមរយៈរបាយការណ៍របស់អនុគណៈកម្មការសុវត្ថិភាពចរាចរណ៍ផ្លូវគោកខេត្តស្ទឹងត្រែង បានបង្ហាញថា នៅពាក់កណ្តាលឆ្នាំ២០២០ គិតត្រឹមខែមិថុនានេះ ក្នុងខេត្តស្តឹងត្រែងគ្រោះថ្នាក់ចរចរណ៍ផ្លូវគោកបានកើតមានចំនួន ៣៦លើក បណ្តាលឱ្យមានអ្នកស្លាប់ ២១នាក់ របួសធ្ងន់ ២៨នាក់ របួសស្រាល ១០នាក់ ខូចខាតយានយន្ត ម៉ូតូ៣៧គ្រឿង រថយន្ត ១៧គ្រឿង និងយានផ្សេងៗ ២គ្រឿង។ មូលហេតុដែលបង្កឱ្យគ្រោះថ្នាក់ភាគច្រើន គឺបណ្តាលមកពីការបើកបរលើសល្បឿនកំណត់ ៦១% ខ្វះការប្រុងប្រយ័ត្ន ១១% មិនគោរពសិទ្ធិ ៩% ប្រជែង ៣% មិនប្រកាន់ស្តាំ ៣% ជាដើម។ ក្រោយពីចាប់អនុវត្តការរឹតបន្តឹងការអនុវត្តច្បាប់ស្តីពីចរាចរណ៍ផ្លូវគោក ចាប់ពីថ្ងៃទី១ ខែឧសភា ឆ្នាំ២០២០ រហូតដល់ថ្ងៃ២០ ខែមិថុនា ឆ្នាំ២០២០នេះមក បានបង្ហាញថា គ្រោះថ្នាក់ចរាចរណ៍បានថយចុះចំនួន ២២% ធៀបនឹងឆ្នាំ២០១៩។
មានមតិសំណេះសំណាលក្នុងអង្គពិធី លោកជំទាវអគ្គលេខាធិការ បានមានប្រសាសន៍ថាទោះបីជានៅកម្ពុជាមានមនុស្សឆ្លងជំងឺកូវីត១៩ ក៏ជំងឺនេះមិនទាន់បានសម្លាប់អាយុជីវិតនរណាម្នាក់នៅឡើយទេ។ដោយឡែកគ្រោះថ្នាក់ចរាចរណ៍តែងតែងឆក់យកអាយុជីវិតប្រជាពលរដ្ឋស្លូតត្រង់ ដែលជាមធ្យម គឺ មានអ្នកស្លាប់ចំនួន ៥នាក់ក្នុងមួយថ្ងៃ។ លោកជំទាវក៏បានអំពាវនាវដល់ប្រជាពលរដ្ឋ ដែលបានចូលរួមទាំងអស់ ត្រូវគោរព និងអនុវត្តច្បាប់ស្តីពីចរាចរណ៍ផ្លូវគោកឱ្យបានខ្ជាប់ខ្ជួន និងយកអ្វីដែលបានចេះដឹងទៅអប់រំបន្តដល់បងប្អូន ញាតិមិត្តរបស់ខ្លួនជាប្រចាំ ដើម្បីចូលរួមការពារអាយុជីវិតខ្លួនឯង និងអ្នកដទៃ ប្រកបដោយឆន្ទៈភ្ញាក់រលឹកខ្ពស់ សំដៅលើកស្ទួយកិត្តិយស សេចក្តីថ្លៃថ្នូរ និងសណ្តាប់ធ្នាប់សង្គម។
គួរបញ្ជាក់ថា ការរៀបចំយុទ្ធនាការអប់រំផ្សព្វផ្សាយស្តីពីសុវត្ថិភាពចរាចរណ៍ផ្លូវគោកនាពេលនេះ មានគោលបំណងដើម្បីពញ្ញាក់ស្មារតីដល់អ្នកប្រើប្រាស់ផ្លូវទាំងអស់ ជាពិសេសអ្នកប្រើប្រាស់ទោចក្រយានយន្ត ឱ្យយកចិត្តទុកដាក់ និងចូលរួមគោរពច្បាប់ស្តីពីចរាចរណ៍ផ្លូវគោក ពាក់មួកសុវត្ថិភាពនៅគ្រប់ពេលធ្វើដំណើរ មិនថាទៅទីជិត ឬឆ្ងាយឡើយ ការពារការប៉ះទង្គិចផ្នែកក្បាល និងចូលរួមទប់ស្កាត់ កាត់បន្ថយគ្រោះថ្នាក់ចរាចរណ៍ផ្លូវគោកឱ្យនៅកម្រិតទាប។
នៅក្នុងយុទ្ធនាការនេះ ក៏មានការសាកសួរអំពីការយល់ដឹងរបស់បងប្អូនប្រជាពលរដ្ឋអំពីសុវត្ថិភាពចរាចរណ៍ ការណែនាំអំពីកម្មវិធី Cambodia Driving Rules ដែលជាកម្មវិធីមួយដ៏ងាយស្រួលសម្រាប់បងប្អូនប្រជាពលរដ្ឋអាចធ្វើការរៀនសូត្រអំពីច្បាប់ស្តីពីចរាចរណ៍ផ្លូវគោក ព្រមទាំងអាចប្រលងសាកល្បងសមត្ថភាពរបស់ខ្លួន និងរបៀបនៃការពាក់មួកសុវត្ថិភាពឱ្យបានត្រឹមត្រូវ ព្រមទាំងការចែកជូននូវ មួកសុវត្ថិភាព សៀវភៅច្បាប់ស្តីពីចរាចរណ៍ផ្លូវគោក សៀវភៅអ្វីដែលអ្នកបើកបរទោចក្រយានយន្តត្រូវយល់ដឹង ខិត្តប័ណ្ណជំនួយស្មារតីស្តីពីសុវត្ថិភាពចរាចរណ៍។
នៅក្នុងយុទ្ធនាការនេះ ក៏មានការណែនាំដល់អ្នកចូលរួមក្នុងយុទ្ធនាការអំពីវិធានទប់ស្កាត់ជំងឺ កូវីដ -១៩ តាមរយៈការរក្សាគម្លាត ការពាក់ម៉ាសការពារ ការថែរក្សាសុខភាព និងអនាម័យខ្លួនប្រាណតាមការណែនាំរបស់ក្រសួងសុខាភិបាល ដើម្បីចូលរួមចំណែកជាមួយរាជរដ្ឋាភិបាលក្នុងការទប់ស្កាត់ជំងឺ កូវីដ -១៩ ផងដែរ។