យុទ្ធនាការអប់រំផ្សព្វផ្សាយច្បាប់ស្តីពីសុវត្ថិភាពចរាចរណ៍ផ្លូវគោក ក្រោមអធិបតីភាព លោកជំទាវ មឹន មាណវី រដ្ឋលេខាធិការ ក្រសួងសាធារណការ និងដឹកជញ្ជូន និងជាអគ្គលេខាធិការ នៃគណៈកម្មាធិការជាតិសុវត្ថិភាពចរាចរណ៍ផ្លូវគោក នៅមន្ទីរសាធារណការ និងដឹកជញ្ជូនខេត្តកំពត

នៅព្រឹកថ្ងៃអង្គារ ១កើត ខែស្រាពណ៍ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី២១ ខែកក្កដា ឆ្នាំ២០២០ នៅមន្ទីរសាធារណការ និងដឹកជញ្ជូនខេត្តកំពត មានរៀបចំយុទ្ធនាការអប់រំផ្សព្វផ្សាយ ច្បាប់​ស្តីពីសុវត្ថិភាពចរាចរណ៍ផ្លូវគោក ក្រោមអធិបតីភាព លោកជំទាវ មឹន មាណវី រដ្ឋលេខាធិការ ក្រសួង​សាធារណការ និងដឹកជញ្ជូន និងជាអគ្គលេខាធិការនៃគណៈកម្មាធិការជាតិ​សុវត្ថិភាពចរាចរណ៍​ផ្លូវគោក និងឯកឧត្តម អ៊ឹង ឆាយ អភិបាលរងខេត្តកំពត និងជាតំណាងឯកឧត្តម ជាវ តាយ អភិបាលនៃ​គណៈ​អភិបាលខេត្តកំពត។ អមដំណើរគណៈអធិបតីចូលរួមក្នុងកម្មវិធីមាន លោក ព្រំ វន្ថា ប្រធាននាយកដ្ឋាន​សុវត្ថិភាពចរាចរណ៍ផ្លូវគោក និងជាប្រធានផ្នែកអប់រំផ្សព្វផ្សាយ នៃអគ្គលេខាធិការដ្ឋាន គ.ស.ច.គ. លោក ជីញ គួង ប្រធានមន្ទីរសាធារណការ និងដឹកជញ្ជូនខេត្តកំពត និងជាប្រធានលេខាធិការដ្ឋាន​នៃអនុគណៈ​កម្មការសុវត្ថិភាពចរាចរណ៍ផ្លូវគោកខេត្តកំពត លោកអភិបាលក្រុងកំពត លោកស្នងការ​នៃស្នងការដ្ឋាន​នគរបាលខេត្តកំពត និងលោកមេបញ្ជាការកងរាជអាវុធហត្ថខេត្តកំពត។

ពិធីនេះរៀបចំឡើងដោយ នាយកដ្ឋានសុវត្ថិភាពចរាចរណ៍ផ្លូវគោក នៃអគ្គនាយកដ្ឋានដឹកជញ្ជូនផ្លូវគោក ក្រសួងសាធារណការ និងដឹកជញ្ជូន សហការជាមួយ អគ្គលេខាធិការដ្ឋាននៃគណៈកម្មាធិការជាតិ​សុវត្ថិភាពចរាចរណ៍ផ្លូវគោក មន្ទីរសាធារណការ និងដឹកជញ្ជូនខេត្តកំពត លេខាធិការដ្ឋានអនុ​គណៈកម្មការ​​សុវត្ថិភាពចរាចរណ៍ផ្លូវគោកខេត្តកំពត និង ស.ស.យ.ក ក្នុងវិស័យសាធារណការ និងដឹកជញ្ជូន និងមានចូលរួមពីលោកអនុប្រធានមន្ទីរសាធារណការ និងដឹកជញ្ជូនខេត្តកំពត មន្ត្រីក្រោម​ឱវាទមន្ទីរសាធារណការ និងដឹកជញ្ជូនខេត្តកំពត មន្ត្រីនគរបាលចរាចរណ៍ផ្លូវគោកខេត្តកំពត និងបងប្អូន​ប្រជាពលរដ្ឋរស់នៅក្នុងខេត្តកំពត សរុបប្រមាណ ១១០នាក់។

គោលបំណងនៃការរៀបចំយុទ្ធនាការអប់រំផ្សព្វផ្សាយនេះ គឺដើម្បីជាការពញ្ញាក់ស្មារតីដល់អ្នកប្រើប្រាស់ផ្លូវ​ទាំងអស់ ជាពិសេសអ្នកប្រើប្រាស់ទោចក្រយានយន្ត ឱ្យយកចិត្តទុកដាក់ និងចូលរួមគោរពច្បាប់ស្តីពី​ចរាចរណ៍ផ្លូវគោក សំដៅចូលរួមទប់ស្កាត់ និងកាត់បន្ថយគ្រោះថ្នាក់ចរាចរណ៍ផ្លូវគោកឱ្យនៅកម្រិតទាប​បំផុត។ នៅក្នុងយុទ្ធនាការនេះ ក៏មានពិធីសំណេះសំណាលជាមួយបងប្អូនប្រជាពលរដ្ឋ សួរនាំអំពី​សុវត្ថិភាពចរាចរណ៍ផ្លូវគោក និងមានការណែនាំយុវជនឱ្យរៀនអំពីវិធីប្រើប្រាស់កម្មវិធីអប់រំច្បាប់​ស្តីពី​ចរាចរណ៍​ផ្លូ​វគោក (Cambodia Driving Rules) ដែលជាកម្មវិធីមួយដ៏ងាយស្រួលសម្រាប់បងប្អូន​ប្រជាពលរដ្ឋ​អាចធ្វើការរៀនសូត្រអំពីច្បាប់ស្តីពីចរាចរណ៍ផ្លូវគោក និងអាចប្រលងសាកល្បងសមត្ថភាព​របស់ខ្លួនបាន។ សម្ភារៈ និងឯកសារដែលចែកជូនអ្នកចូលរួម រួមមាន មួកសុវត្ថិភាព សៀវភៅច្បាប់​ស្តីពីចរាចរណ៍ផ្លូវគោក សៀវភៅអ្វីដែលអ្នកបើកបរទោចក្រយានយន្តត្រូវយល់ដឹង ខិត្តប័ណ្ណជំនួយស្មារតី​ស្តី​ពីសុវត្ថិភាពចរាចរណ៍ ខិត្តប័ណ្ណគោរពច្បាប់ចរាចរណ៍(សសយក) និងស្ទីកឃ័រចំណាំងផ្លាត។

ក្រសួងសាធារណការ និងដឹកជញ្ជូនបានអំពាវនាវដល់ប្រជាពលរដ្ឋដែលជាអ្នកប្រើប្រាស់ផ្លូវ ត្រូវចូលរួម​គោរព និងអនុវត្តច្បាប់ស្តីពីចរាចរណ៍ផ្លូវគោកឱ្យបានព្រមៗគ្នា ដើម្បីការពារអាយុជីវិតខ្លួនឯង និងអ្នកដទៃ ប្រកបដោយឆន្ទៈភ្ញាក់រលឹកខ្ពស់ សំដៅលើកស្ទួយកិត្តិយស សេចក្តីថ្លៃថ្នូរ និងសណ្តាប់ធ្នាប់​សង្គម​នៅ​ក្នុងព្រះរាជាណាចក្រកម្ពុជា។
គួរបញ្ជាក់ថា រាជរដ្ឋាភិបាលបានកំណត់យកឆ្នាំ២០២០ ជាឆ្នាំនៃការរឹតបន្តឹងការអនុវត្តច្បាប់​ស្តីពី​ចរាចរណ៍ផ្លូវគោក ក្នុងការទប់ស្កាត់ និងកាត់បន្ថយឱ្យបានអតិបរមានូវកំណើនគ្រោះថ្នាក់ចរាចរណ៍ កំណើន​អ្នកស្លាប់ និងរបួសដោយគ្រោះថ្នាក់ចរាចរណ៍ផ្លូវគោក ដោយបានចាប់អនុត្តការរឹត​បន្តឹង​ការអនុវច្បាប់​ស្តីពីចរាចរណ៍ផ្លូវគោក ចាប់តាំងពីថ្ងៃទី០១ ខែឧសភា ឆ្នាំ២០២០ មក។ នៅក្នុង​យុទ្ធ​នា​ការ​នេះ ក៏មានការណែនាំដល់អ្នកចូលរួមក្នុងយុទ្ធនាការអំពីវិធានទប់ស្កាត់ជំងឺ Covid-19 តាមរយៈការ​រក្សាគម្លាត ការពាក់ម៉ាសការពារ ការថែរក្សាសុខភាព និងអនាម័យខ្លួនប្រាណតាមការណែនាំ​របស់ក្រសួង​សុខាភិបាល ដើម្បីចូលរួមចំណែកជាមួយរាជរដ្ឋាភិបាលក្នុងការទប់ស្កាត់ជំងឺ Covid-19 ផងដែរ។