ពិធីបើកវគ្គបណ្តុះបណ្តាលច្បាប់ស្តីពីចរាចរណ៍ផ្លូវគោក ដល់បុគ្គលិកក្រុមហ៊ុនឯកជន ដែលបានចុះបញ្ជីនៅក្រសួងពាណិជ្ជកម្ម រៀបចំឡើងដោយនាយកដ្ឋានសុវត្ថិភាពចរាចរណ៍ផ្លូវគោក
នៅព្រឹកថ្ងៃសុក្រ ៤កើត ខែស្រាពណ៍ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី២៤ ខែកក្កដា ឆ្នាំ២០២០ នៅទីស្តីការក្រសួងសាធារណការ និងដឹកជញ្ជូន នាយកដ្ឋានសុវត្ថិភាពចរាចរណ៍ផ្លូវគោក នៃអគ្គនាយកដ្ឋានដឹកជញ្ជូនផ្លូវគោក ក្រសួងសាធារណការ និងដឹកជញ្ជូន​បានរៀបចំវគ្គបណ្តុះបណ្តាលច្បាប់ស្តីពីចរាចរណ៍ផ្លូវគោក ដល់បុគ្គលិកក្រុមហ៊ុនឯកជន ដែលបានចុះបញ្ជីនៅក្រសួងពាណិជ្ជកម្ម ក្រោមអធិបតីភាព លោកជំទាវ មឹន មាណវី រដ្ឋលេខាធិការ ក្រសួងសាធារណការ និងដឹកជញ្ជូន និងជាអគ្គលេខាធិការ នៃគណ:កម្មាធិការជាតិសុវត្ថិភាពចរាចរណ៍ផ្លូវគោក និងចូលរួមអមដំណើរដោយ ឯកឧត្តម ប៉ែន បូរាណ អនុរដ្ឋលេខាធិការក្រសួងសាធារណការ និងដឹកជញ្ជូន និងជាអគ្គលេខាធិការរង នៃអគ្គលេខាធិការដ្ឋាន គ.ស.ច.គ. ឯកឧត្តម សេន ស៊ីហ៊ត់ អនុរដ្ឋលេខាធិការក្រសួងសាធារណការ និងដឹកជញ្ជូន លោក ឌុយ ច័ន្ទដារ៉ា អគ្គនាយករង នៃអគ្គនាយកដ្ឋានដឹកជញ្ជូនផ្លូវគោក លោក ព្រំ វន្ថា ប្រធាននាយកដ្ឋានសុវត្ថិភាពចរាចរណ៍ផ្លូវគោក នៃអគ្គនាយកដ្ឋានដឹកជញ្ជូនផ្លូវគោក និងលោកឧត្តមសេនីយ៍ទោ ឡុង ធូរ អនុប្រធាននាយកដ្ឋាននគរបាលចរាចរណ៍ និងសណ្តាប់ធ្នាប់សាធារណ: នៃអគ្គស្នងការនគរបាលជាតិ។
សិក្ខាកាមជាបុគ្គលិកក្រុមហ៊ុនឯកជនចំនួន ៤៤នាក់ មកពីក្រុមហ៊ុនចំនួន ២២ បានចូលរួមវគ្គក្នុងបណ្តុះបណ្តាលនាពេលនេះ។
ការៀបចំវគ្គបណ្តុះបណ្តាលនេះ មានគោលបំណងអប់រំផ្សព្វផ្សាយច្បាប់ស្តីពីចរាចរណ៍ផ្លូវគោក និងសុវត្ថិភាពចរាចរណ៍ផ្លូវគោក ដល់ក្រុមហ៊ុនឯកជនទាំងអស់ដែលបានចុះបញ្ជីនៅក្រសួងពាណិជ្ជកម្ម និងដើម្បីចែករំលែកចំណេះដឹងដល់ក្រុមហ៊ុនទាំងនោះ មានសមត្ថភាពអប់រំ និងផ្សព្វផ្សាយបន្តដល់បុគ្គលិកនៅក្នុងក្រុមហ៊ុនរបស់ខ្លួន។
គួរបញ្ជាក់ថា បន្ទាប់ពីទទួលគោលការណ៍ណែនាំ និងឯកភាពពី ឯកឧត្តមទេសរដ្ឋមន្ត្រី នាយកដ្ឋានចរាចរណ៍ផ្លូវគោក នៃអគ្គនាយកដ្ឋានដឹកជញ្ជូនផ្លូវគោក បានចាប់ផ្តើមបើកវគ្គបណ្តុះបណ្តាលច្បាប់ស្តីពីចរាចរណ៍ផ្លូវគោក ដល់បុគ្គលិកក្រុមហ៊ុនឯកជននៅទូទាំងប្រទេស ហើយនិងបន្តបណ្តុះបណ្តាលរហូតគ្រប់ចំនួនក្រុមហ៊ុនដែលបានចុះបញ្ជី។