សិក្ខាសាលាស្តីពីការអភិវឌ្ឍការគ្រប់គ្រងសុវត្ថិភាពចរាចរណ៍ផ្លូវគោក និងការធ្វើឱ្យប្រសើរឡើងនូវប្រព័ន្ធសុវត្ថិភាព ក្នុងខេត្តព្រះសីហនុ និងខេត្តតាកែវ

នៅថ្ងៃសុក្រ ១១កើត ខែស្រាពណ៍ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី៣១ ខែកក្កដា ឆ្នាំ២០២០ លោកជំទាវ មឹន មាណវី រដ្ឋលេខាធិការ ក្រសួងសាធារណការ និងដឹកជញ្ជូន និងជាអគ្គលេខាធិការនៃគណៈកម្មាធិការជាតិសុវត្ថិភាពចរាចរណ៍ផ្លូវគោក អមដំណើរដោយ ឯកឧត្តម សេន ស៊ីហ៊ត់ អនុរដ្ឋលេខាធិការ ក្រសួងសាធារណការ និងដឹកជញ្ជូន និងលោក ព្រំ វន្ថា ប្រធាននាយកដ្ឋានសុវត្ថិភាពចរាចរណ៍ផ្លូវគោក បានដឹកនាំមន្ត្រីជំនាញផ្នែកសុវត្ថិភាពចរាចរណ៍ផ្លូវគោក នៃក្រសួងសាធារណការ និងដឹកជញ្ជូន ចូលរួមក្នុងសិក្ខាសាលាស្តីពីការអភិវឌ្ឍការគ្រប់គ្រងសុវត្ថិភាពចរាចរណ៍ផ្លូវគោក និងការធ្វើឱ្យប្រសើរឡើងនូវប្រព័ន្ធសុវត្ថិភាពក្នុងខេត្តព្រះសីហនុ និងខេត្តតាកែវ ដែលបានរៀបចំឡើងនៅសណ្ឋាគារ Rosewood រាជធានីភ្នំពេញ។
សិក្ខាសាលានេះ បានបង្ហាញអំពីសមិទ្ធផលការងារដែលបានអនុវត្តកន្លងមក និងបញ្ជាក់បន្ថែមអំពីគោលបំណងនៃគម្រោងកសាងប្រព័ន្ធគ្រប់គ្រងសុវត្ថិភាពចរាចរណ៍ និងគ្រោះថ្នាក់ចរាចរណ៍ផ្លូវគោកនៅកម្ពុជា ដោយធ្វើការសិក្សា សាកល្បងទៅលើខេត្តចំនួន២ គឺខេត្តតាកែវ និងខេត្តព្រះសីហនុ ដែលជាគម្រោងរបស់កម្មវិធីចែករំលែកចំណេះដឹងរបស់កូរ៉េ (KSP) ក្នុងនោះនឹងកសាងនូវយុទ្ធសាស្ត្រគ្រប់គ្រងទិន្នន័យគ្រោះថ្នាក់ចរាចរណ៍ដើម្បីលើកកម្ពស់សុវត្ថិភាពចរាចរណ៍ ចែករំលែកមេរៀនបទពិសោធន៍នាពេលកន្លងមកពាក់នឹងប្រព័ន្ធសុវត្ថិភាពចរាចរណ៍របស់កូរ៉េ ស្នើឱ្យមានផែនការអភិវឌ្ឍន៍សម្រាប់ប្រព័ន្ធគ្រប់គ្រងសុវត្ថិភាពចរាចរណ៍នៅកម្ពុជា រួមនិងផ្តល់នូវការបណ្តុះបណ្តាលសមត្ថភាពដល់មន្ត្រីរបស់កម្ពុជាផងដែរ។
គួរបញ្ជាក់ថា សិក្ខាសាលានេះត្រូវបានគ្រោងនឹងរៀបចំឡើងនៅសាធារណរដ្ឋកូរ៉េ ប៉ុន្តែដោយសារបញ្ហាជំងឺកូវីដ-១៩ ក៏ត្រូវរៀបចំជាលក្ខណៈជាកិច្ចពិភាក្សាតាម video conference ជំនួសឱ្យកិច្ចពិភាក្សាផ្ទាល់ទៅវិញ។
សិក្ខាសាលានេះក៏មានការចូលរួមពីមន្ត្រីមកពីនាយកដ្ឋានសុវត្ថិភាពចរាចរណ៍ផ្លូវគោក មន្ទីរសាធារណការ និងដឹកជញ្ជូនខេត្តតាកែវ មន្ទីរសាធារណការ និងដឹកជញ្ជូនខេត្តព្រះសីហនុ តំណាងធនាគារ Korea Export-Import Bank of Korea និង តំណាង Korean Engineering Consultant Corp (KECC), តំណាង Korea National University of Transportation (KNUT) និង តំណាង Road Traffic Authority (KoRoad)។