នៅថ្ងៃចន្ទ ៦កើត ខែភទ្របទ ឆ្នាំជូត ទោស័ក ព.ស២៥៦៤ ត្រូវនឹងថ្ងៃទី២៤ ខែសីហា ឆ្នាំ២០២០ លោក បូរាណ សត្យា អនុប្រធាននាយកដ្ឋានសុវត្ថិភាពចរាចរណ៍ផ្លូវគោក បានដឹកនាំក្រុមការងារការិយាល័យត្រួតពិនិត្យ និងវាយតម្លៃ នៃនាយកដ្ឋានសុវត្ថិភាពចរាចរណ៍ផ្លូវគោក នៃអគ្គនាយកដ្ឋានដឹកជញ្ជូនផ្លូវគោក ចុះត្រួតពិនិត្យទីតាំងដែលមានគ្រោះថ្នាក់ចរាចរណ៍ញឹកញាប់ នៅលើតាមបណ្តោយផ្លូវជាតិលេខ៧ ត្រង់ចន្លោះបង្គោលគីឡូលេខ ៣៤១+០០០ និង ៣៤៨+០០០ ស្ថិតក្នុងភូមិចង្ក្រង់ ឃុំចង្ក្រង់ ស្រុកចិត្របុរី ខេត្តក្រចេះ។

ការចុះត្រួតពិនិត្យទីតាំងខាងលើ មានគោលបំណងដើម្បីរកមូលហេតុដែលបង្កឱ្យកើតមានគ្រោះថ្នាក់ចរាចរណ៍ញឹកញាប់ និងរកនូវដំណោះស្រាយក្នុងការកែលម្អទីតាំងគ្រោះថ្នាក់ទាំងនោះ មិនឱ្យកើតមានគ្រោះថ្នាក់ចរាចរណ៍ជាយថាហេតុតទៅទៀត។

ក្នុងសកម្មភាពនៃការចុះត្រួតពិនិត្យនេះ ក៏មានការចូលរួមសហការពី មន្ត្រី នៃមន្ទីរសាធារណការ និងដឹកជញ្ជូនខេត្តក្រចេះ និងមន្រ្តីនគរបាលចរាចរណ៍ នៃស្នងការដ្ឋាននគរបាលខេត្តក្រចេះផងដែរ៕