វគ្គបណ្តុះបណ្តាលរយៈពេល៣ថ្ងៃ ស្តីពីការសិក្សាស្រាវជ្រាវ នៃការខាតបង់សេដ្ឋកិច្ចដោយសារគ្រោះថ្នាក់ចរាចរណ៍ផ្លូវគោក

.........................................................

ថ្ងៃពុធ ១៥កើត ខែភទ្របទ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី ០២ ខែកញ្ញា ឆ្នាំ២០២០ មន្ត្រីជំនាញសុវត្ថិភាពចរាចរណ៍ផ្លូវគោក នៃនាយកដ្ឋានសុវត្ថិភាពចរាចរណ៍ផ្លូវគោក បានចូលរួមក្នុងវគ្គបណ្តុះបណ្តាល ស្តីពីការសិក្សាស្រាវជ្រាវ នៃការខាតបង់សេដ្ឋកិច្ចដោយសារគ្រោះថ្នាក់ចរាចរណ៍ផ្លូវគោក ដែលរៀបចំឡើងដោយអង្គការ UNDP ប្រចាំនៅកម្ពុជា នៅសាកលវិទ្យាល័យជាតិគ្រប់គ្រង រាជធានីភ្នំពេញ។ វគ្គបណ្តុះបណ្តាលនេះ មានរយៈពេល ៣ថ្ងៃ គឺចាប់ពីថ្ងៃទី០២ ដល់ថ្ងៃទី០៤ ខែកញ្ញា ឆ្នាំ២០២០។

គោលបំណង នៃវគ្គបណ្តុះបណ្តាលនេះ គឺដើម្បីបណ្តុះបណ្តាលសមត្ថភាពដល់មន្ត្រីសុវត្ថិភាពចរាចរណ៍លើផ្នែកសិក្សាស្រាវជ្រាវអំពីការខាតបង់សេដ្ឋកិច្ចដោយសារគ្រោះថ្នាក់ចរាចរណ៍ និងជួយពង្រឹងសមត្ថភាពបន្ថែមលើការគ្រប់គ្រង និងការវិភាគទិន្នន័យគ្រោះថ្នាក់ចរាចរណ៍ផ្លូវគោក។

វគ្គបណ្តុះបណ្តាលនេះ ក៏មានការអនុវត្តនូវវិធានការទប់ស្កាត់ជំងឺកូវីដ-១៩ តាមរយៈការរក្សាចន្លោះសុវត្ថិភាព ពាក់ម៉ាសការពារ និងការលាងសម្អាតដៃ តាមការណែនាំរបស់ក្រសួងសុខាភិបាលផងដែរ។