កិច្ចប្រជុំពិភាក្សា រវាងនាយកដ្ឋានសុវត្ថិភាពចរាចរណ៍ផ្លូវគោក និងតំណាងផលិតករផលិតវីដេអូស្ពតអប់រំស្តីពីសុវត្ថិភាពចរាចរណ៍ផ្លូវគោក
————————————

នៅរសៀល ថ្ងៃចន្ទ ១២រោច ខែភទ្របទ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី១៤ ខែកញ្ញា ឆ្នាំ២០២០ នៅបន្ទប់ប្រជុំអគ្គនាយកដ្ឋានដឹកជញ្ជូនផ្លូវគោក លោក ព្រំ វន្ថា ប្រធាននាយកដ្ឋានសុវត្ថិភាពចរាចរណ៍ផ្លូវគោក នៃអគ្គនាយកដ្ឋានដឹកជញ្ជូនផ្លូវគោក និងជាអនុប្រធានអចិន្រ្តៃយ៍ក្រុមការងារការត្រួតពិនិត្យការរៀបចំថតវីដេអូអប់រំស្តីពីសុវត្ថិភាពចរាចរណ៍ផ្លូវគោក​ នៃអគ្គលេខាធិការដ្ឋាន គ.ស.ច.គ. ព្រមទាំងមន្ត្រីនាយកដ្ឋានសុវត្ថិភាពចរាចរណ៍ផ្លូវគោក បានជួបប្រជុំពិភាក្សាការងារជាមួយតំណាងផលិតករផលិតវីដេអូស្ពតអប់រំស្តីពីសុវត្ថិភាពចរាចរណ៍ ដើម្បីពិនិត្យ និងកែសម្រួលលើពាក្យពេចន៍ ខ្លឹមសារសាច់រឿង ដែលគ្រោងនឹងរៀបចំផលិតក្នុងពេលឆាប់ៗនេះ បន្ទាប់ពីបានសម្រេចជ្រើសរើសចំណងជើងមក។
ភាគីទាំងពីរបានពិភាក្សា និងឯកភាពកែសម្រួលលើចំណុចមួយចំនួន ក្នុងគោលបំណងធ្វើយ៉ាងណាឱ្យខ្លឹមសារសាច់រឿងសម្រាប់យកទៅអប់រំផ្សព្វផ្សាយនោះ មានភាពច្បាស់លាស់ សមស្របទៅតាមតថភាព និងការរីកចម្រើនរបស់សង្គមជាតិ។