សិក្ខាសាលាបណ្តុះបណ្តាលរបស់គម្រោងអភិវឌ្ឍន៍ការគ្រប់គ្រងចរាចរណ៍ផ្លូវគោក និងការកែលម្អប្រព័ន្ធសុវត្ថិភាពចរាចរណ៍ផ្លូវគោក

 

នៅថ្ងៃចន្ទ ១០រោច ខែអស្សុជ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី១២ ខែតុលា ឆ្នាំ២០២០ នៅសណ្ឋាគារភ្នំពេញ ឯកឧត្តម សេន ស៊ីហ៊ត អនុរដ្ឋលេខាធិការ ក្រសួងសាធារណការ និងដឹកជញ្ជូន

និងអមដំណើរដោយ លោក ព្រំ វន្ថា ប្រធាននាយកដ្ឋានសុវត្ថិភាពចរាចរណ៍ផ្លូវគោក បានចូលរួមជាអធិបតីភាពក្នុងសិក្ខាសាលាបណ្តុះបណ្តាលសមត្ថភាពតាមរយៈវីដេអូ conference ដែលជាផ្នែកមួយនៃគម្រោងអភិវឌ្ឍន៍ការគ្រប់គ្រងចរាចរណ៍ផ្លូវគោក និងការកែលម្អប្រព័ន្ធសុវត្ថិភាពចរាចរណ៍ផ្លូវគោកនៅខេត្តតាកែវ និងខេត្តព្រះសីហនុ។ សិក្ខាកាមដែលត្រូវបានអញ្ជើញចូលរួមក្នុងសិក្ខាសាលាបណ្តុះបណ្តាលសមត្ថភាពនេះ រួមមាន៖ មន្ត្រីនាយកដ្ឋានសុវត្ថិភាពចរាចរណ៍ផ្លូវគោក មន្ត្រីជំនាញ ដែលមកពីមន្ទីរសាធារណការ និងដឹកជញ្ជូន ខេត្តតាកែវ និងខេត្តព្រះសីហនុ សរុបចំនួន ១៤រូប។

វគ្គបណ្តុះបណ្តាលនេះបានចែករំលែកនូវចំណេះដឹង និងបទពិសោធន៍របស់សាធារណរដ្ឋកូរ៉េ ពាក់ព័ន្ធទៅនឹងសុវត្ថិភាពចរាចរណ៍ផ្លូវគោក, ប្រព័ន្ធគ្រប់គ្រងគ្រោះថ្នាក់ចរាចរណ៍ផ្លូវគោក (TAAS), ប្រព័ន្ធប្រតិបត្តិការរបស់រថយន្តក្រុងសាធារណៈ(BRT), មជ្ឍមណ្ឌលព័ត៌មានចរាចរណ៍នៅទីក្រុង, ភាពច្នៃប្រឌិតថ្មីរបស់ប្រព័ន្ធដឹកជញ្ជូនឆ្លាតវៃ(ITS), វិធានការសុវត្ថិភាពចរាចរណ៍ផ្លូវគោក និងដំណើរការនៃការប្រលងយកបណ្ណបើកបរនៅសាធារណរដ្ឋកូរ៉េ។

បន្ទាប់ពីបញ្ចប់វគ្គបណ្តុះបណ្តាលនេះរួចមក ក៏មានជំនួបប្រជុំកម្រិតថ្នាក់ដឹកនាំរបស់ក្រសួងសាធារណការ និងដឹកជញ្ជូន និងតំណាងភាគីកូរ៉េ ដើម្បីពិភាក្សាពង្រឹងកិច្ចសហប្រតិបត្តិការបន្ថែមទៀត។ ភាគីខាងកូរ៉េ បានសំណូមពរដល់ភាគីកម្ពុជាឱ្យលើកសំណើសុំជាកម្ចីថវិកា ដើម្បីដំណើការអភិវឌ្ឍប្រព័ន្ធគ្រប់គ្រងទិន្នន័យគ្រោះថ្នាក់ចរាចរណ៍ផ្លូវគោកនៅកម្ពុជាបានប្រសើរឡើងជាងមុន។

វគ្គបណ្តុះបណ្តាលនេះ បានប្រព្រឹត្តទៅក្នុងរយៈពេល ០២ថ្ងៃគឺចាប់ពីថ្ងៃទី១២ និង១៣ ខែតុលា ឆ្នាំ២០២០។